Մադրիդում կայացել է օտարերկրյա համալսարաններում գործող հայագիտական կենտրոնների անդրանիկ համաժողովը

21 նոյեմբերի, 2024

Իսպանիայում ՀՀ դեսպանության նախաձեռնությամբ և ՀՀ կրթության, գիտության, մշակույթի և սպորտի նախարարության աջակցությամբ նոյեմբերի 21-22-ը Մադրիդի Կոմպլուտենս համալսարանում անցկացվել է օտարերկրյա համալսարաններում գործող հայագիտական կենտրոնների անդրանիկ համաժողովը:

2022 թվականի նոյեմբերից Կոմպլուտենս համալսարանում ՀՀ պետական ֆինանսավորմամբ գործում է Իսպանիայում առաջին հայագիտական ամբիոնը՝ Աշխարհագրության և պատմության ֆակուլտետի կառուցվածքում, որը ղեկավարում է պրոֆեսոր Ֆրանսիսկո Սուրյանը:

ՀՀ ԿԳՄՍ նախարարի տեղակալ Արթուր Մարտիրոսյանը խորհրդանշական է համարել, որ առաջին անգամ կազմակերպվող հայագիտական համաժողովն անցկացվում է Կոմպլուտենս համալսարանում, որը բոլորովին վերջերս է համալրել ՀՀ պետական բյուջեի ֆինանսավորմամբ ստեղծված հայագիտական կենտրոնների ցանկը:

Իսպանիայի Թագավորությունում ՀՀ արտակարգ և լիազոր դեսպան Սոս Ավետիսյանը կարևորել է նմանօրինակ ձևաչափով հայագիտական համաժողովի անցկացումը՝ մասնակիցներին մաղթելով հաջողություն և արդյունավետ աշխատանք:

Համաժողովի մասնակիցներին ողջունել է նաև Մադրիդի Կոմպլուտենս համալսարանի Աշխարհագրության և պատմության ֆակուլտետի դեկան Միգել Լուկե Տալավանը՝ ընդգծելով համալսարանում հայագիտական ամբիոնի գործունեության կարևորությունը և պատրաստակամություն հայտնելով աջակցելու ամբիոնի հետագա զարգացմանը:

Համաժողովին ներկա Մադրիդի, Վենետիկի, Հռոմի, Զալցբուրգի, Լայպցիգի, Սինալոայի, Թրակիայի Դեմոկրիտի, Քենեդիի, Ռոսարիոյի, Հալլե-Վիթենբերգի Մ. Լյութերի անվան և մի շարք այլ օտարերկրյա համալսարաններում գործող հայագիտական կենտրոնների ղեկավարները ներկայացրել են իրենց ամբիոնների, կենտրոնների գործունեությունն ու իրականացրած ծրագրերը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր